معالجة ضعف الإملاء عند التلاميذ في الصفوف المتقدمة



وجدت هذا الأمر منتشر بكثرة في مدارسنا، والزملاء يشتكون منه كثيراً في هذا القروب وقروبات أخر.... (شخصي الضعيف قليل العلم والمعرفة) يقترح عليكم بعض الحلول المجربة والتي أحسبها ناجحة، ولكن أنتم بخبراتكم يمكن أن تساعدوننا بطرق أخرى للمعالجة.....

أولًا:
مهارات اللغة هي الاستماع، الكلام، القراءة، ثم الكتابة.
الكتابة دي آخر حاجة، يعني كتابة بجميع أنواعها..
والما بيقرأ صاح ما بيكتب صاح، والعكس صحيح.
قبل العلاج لابد من استخدام سبورة (ثابتة، متحركة، ذات الأجنحة،  ذكية)  أو ورقة على بورد يكتب فيها المعلم ويفضّل السّبورات....
نجي لمشكلة الكتابة وهي غالباً عدم معرفة الحروف أو الخلط بينها خاصة المتشابه منها (ص ض ط ظ ع غ ج ح خ ....إلخ)
وبعد مرات مشكلة صحية لضعف سمع، أو بصر أو مشكلة متعلقة بالإدراك، إنت تملي حاجة هو يكتب حاجة تانية... وللّا نفسية ككراهية المادة أو المعلم، واللّا تدخل اللّغة الأم زي الرطانات والدّارجية بتأثر برضو.
الأخطاء المنتشرة سببها غالبًا عدم المعرفة بالحروف الهجائية وخاصة في حالات تغير الحرف في أول ووسط وآخر الكلمة.
يلّا بعد ما يتقن الحروف تماماً نتدرج معاهو للحركات (أ إ أُ) لازم نقراها ليهو بالتشكيل أي حرف ندهو ليهو بالتلاتة حركات ولازم يجيب أمثلة ليها...ويقراها بعد يجودا تمام .نديهو إملاء في الحروف بالتلاتة حركات.
ونديهو تدريبات توصيل للمتشابهات بالحركات.
بعد داك نجي لحروف المد ودا مربط الفرس، لازم نسمعا ليهو في أضانو (فااااااارس) (كااااااااتب)
يا ولد لامن تسمع اااااااا معناها تكتب (ا) كويس؟
ولامن تسمع ووووووو معناها (و).
وهكذا مع بقية حروف المد.
ثم نتدرج لقواعد لام ألف الشمسية والقمرية وعندهم مشكلة في الشمسية لازم نحكها معاه  شديد عشان ما يجي يكتب لي (اششمس) المهم نعالج الحكاية. ونطول بالنا.
والهمزات بمواضعها المختلفة.
إملاء لكلمات.
ولازم أديهو قطع ورق فيها الكلمات يشيلا معاهو.
برضو نديهو ينقل قطع مختارة (إملاء منقولة).. ونعالج معاهو  الأخطاء، ونديهو إملاء منظورة....ونعالج الأخطاء.
ونخش في إملاء اختبارية. وما نستعجل في الإملاء ليهو نمليهو واحدة واحدة.. ونزيد شوية شوية لامن نمليهو كم كلمة..
ودي البتديك الحقيقة.
لكن للأسف كيف نعالج الأخطاء؟؟
دي دايرة حكمة من المعلم.
لازم ألقط أخطاء التلميذ كلها وأعمل منها تدريبات مختلفة.
يعني مثلاً بيكتب لي (اللالء) خطأ أدخلا ليهو في جملة مثلًا:
يستخرِجُ الغواص .............. من البحر.
أ. الأليء      ب. اللالء     ج. اللآلئ

وبالطريقة دي بقدر أجمع الأخطاء وأعالجها.
المهم أخُت ليهو حقتو الغلط معاهن...
بس أهم شيء الصّبر وكترة التّدريبات وتعويده على الاستهجاء سرًا... الصّبر ثم الصّبر لأنو بتشوف حاجات تزهجك.
وبالله التوفيق.

#مصعب_يس

أترك تعليقا

أحدث أقدم